سفیر حسین حضرت مسلم ابن عقیل ؑ کے یوم شہادت اور یوم عرفہ کی مناسبت سے اجتماعات، آغا حسن نے نمائندہ حسین ؑ کے سفارتی مشن کے اغراض و مقاصد بیان کئے

بڈگام/ نواسہ رسول حضرت امام حسین ؑ کے نمائندہ خاص برائے کوفہ حضرت مسلم ابن عقیل ؑ کے یوم شہادت اور یوم عرفہ کی مناسبت سے جموں و کشمیر انجمن شرعی شیعیان کے اہتمام سے وادی کے اطراف و اکناف میں خصوصی تقاریب کا انعقاد ہوا اس سلسلے کے بڑے اجتماعات مرکزی امام باڑہ بڈگام اور قدیمی امام باڑہ حسن آباد میں منعقد ہوئے۔

جن دیگر مقامت پر اس سلسلے میں مجالس عزا کا انعقاد کیا گیا ان میں خاص طور پر امام باڑہ گامدو اور جامع مسجد صوفی پورہ پہلگام شامل ہیں، ان مقامات پر دن بھر مرثیہ خوانی کی گئی اور دعاء عرفہ کی مجالس کا اہتمام کیا گیا۔

مرکزی امام باڑہ بڈگام میں انجمن شرعی شیعیان کے صدر حجت الاسلام والمسلمین آغا سید حسن الموسوی الصفوی اور قدیمی امام باڑہ حسن آباد میں حجت الاسلام آغا سید مجتبیٰ عباس الموسوی الصفوی نے نماز ظہرین کی پیشوائی کی اور حضرت مسلم ابن عقیل ؑکے کردار و عمل پر روشنی ڈالی اور یوم عرفہ کی فضیلت بیان کی۔

حجت الاسلام والمسلمین آغا سید حسن الموسوی الصفوی نے یوم عرفہ کی اہمیت بیان کرتے ہوئے اس باعظمت دن کو نسل آدم ؑ کے تسلسل کا نقطہ آغاز قرار دیا جب حضرت آدم ؑ اور حضرت حواؑ جنت سے نکالے جانے کے تین سو سال بعد وادی عرفات میں ایک دوسرے سے ملے۔

آغا صاحب نے کہا کہ یوم عرفہ توبہ و استغفار کی قبولیت کا ایک مخصوص دن ہے کیونکہ اسی روز محمد ؐ و آل محمد ؑ کے وسیلے سے جناب آدم ؑ کی توبہ قبول ہوئی۔

حضرت مسلم ابن عقیل ؑکے سفارتی مشن اور دلدوز شہادت کا واقعہ بیان کرتے ہوئے آغا صاحب نے کہا کہ حضرت امام حسین ؑ نے اپنے عمو زاد بھائی کو صرف اس مقصد کے لئے کوفہ روانہ کیا کہ وہ اہل کوفہ کی طرف سے موصول عہد و پیمان وفا پر مبنی ہزاروں خطوط کی اصلیت جان سکیں لیکن عین عرفہ کے روز یزیدی حکومت کے کارندوں نے حضرت مسلم ابن عقیل ؑ کو مسجد کوفہ کے بلند قامت گنبد سے گرا کر درجہ شہادت پر پہنچایا۔

آغا صاحب نے کہا کہ حضرت مسلم ابن عقیل ؑ کا سانحہ شہادت معرکہ کربلا کا سرنامہ اور سفارت کاری کی تاریخ کا کرب ناک باب ہے۔

اس موقعہ پر آغا صاحب نے آسمانی بادل پھٹنے کے نتیجے میں معتدد امرناتھ جی یاتریوں کی ہلاکتوں پر گہرے صدمے کا اظہار کیا اور جان بحق ہونے والے یاتریوں کے لواحقین سے تعزیت کی آغا صاحب نے اس سانحہ میں زخمی ہوئے یاتریوں کی جلد شفا یابی کے لئے دعا کی۔

جواب دیں

آپ کا ای میل ایڈریس شائع نہیں کیا جائے گا۔